SKONER STILBAAI / GROENER HESSEQUA

article-pic-1

Nadat burgemeester Grant Riddles op 16 September die eerste boom geplant het, is die afgelope twee weke meer as 60 inheemse bome deur lede van die Stilbaai Belangeforum (SBF) en die publiek aangeplant. Die twee oop areas wat tans beplant is, is deel van sewe parke of openbare gebiede waarvoor die Belangeforum 150 bome aangekoop het.

Hierdie aksie is ‘n uitbreiding van die Skoner Stilbaai/Groener Hessequa-aksie, soos deur die SBF geloods en word deur meeste Stilbaai verenigings en organisasies, sowel as ‘n groot aantal individue gesteun. Die eerste twee jaar is toegespits op opruim van rommelstrooiery en verwydering van indringer bome soos Port Jacksons en Rooipitjies. Begin van vanjaar het SBF besluit om daarby ook die Hessequa Munisipaliteit se aksie vir die aanplant van bome te ondersteun. Dit word beskou as ‘n proeflopie wat later uitgebrei kan word na ander dorpe in Hessequa.

Die Belangeforum het onderneem om 150 bome aan te koop vir aanplanting en te reël vir hul versorging, mits die Munisipaliteit onderneem om o.a. water aan te lê en gate te maak. Hessequa Munisipaliteit het onmiddellik ingestem. Hierdie samewerkingsaksie tussen die Munisipaliteit en die gemeenskap is tans in volle gang.

Die Voorsitter van die Stilbaai Belangeforum, Gustav Radloff, doen ‘n ernstige beroep op inwoners rondom die betrokke parke om te help met die aanplant en versorging van die bome. Verenigings en organisasies wat die Skoner Stilbaai/Groener Hessequa aksie ondersteun word versoek om ook hul lede tot volgehoue steun om Stilbaai skoner en groener te maak, aan te moedig. Daar is groot waardering vir die instansies en individue wat voortdurend hieraan aandag gee. Rommelstrooiery bly egter steeds ‘n probleem (bosslapers asook sekere lede van die gemeenskap, sowel as vroeë uitsit van vuilgoedsakke) en die verwydering van indringer bome vereis voortdurende aandag.

Dr Gerrit Mars, wat die bome vir Stilbaai baie billik kon bekom en die hele aksie bedryf, het self nog ‘n verdere 2740 boompies aangekoop, terwyl Henry van der Hoven ook ‘n aantal geskenk het. Hierdie bome word beskikbaar gestel vir aanplanting oor die hele Hessequa, met beklemtoning op ons meer afgesonderde gemeenskappe sodat inwoners hul plekke kan verfraai. Etlike honderde is reeds aan Melkhoutfontein en Albertinia gegee en Wyksraadslede word versoek om geskikte gebiede en persone in hul wyke aan te dui om met die verspreiding, aanplanting en versorging behulpsaam te wees. Met goeie ondersteuning sal so verseker word dat die hele Hessequa groener sal word.

John Willemse (willemsej@vodamail.co.za)
Stilbaai Belangeforum (082 377 5212)

BLOUVLAGSTRANDE 2016

article-pic-1

Die blouvlag bekenstellingseremonie het plaasgevind 07 Oktober 2016. Wildlife and Environment Society of South Africa (WESSA) ken die blouvlag status toe tydens die seremonie, wat aangebied word deur die Minister van Toerisme Mnr. Derek Hanekom.

Die hoof kriteria waaraan blouvlagstrande moet voldoen is:

Waterkwaliteit.Omgewingsopvoeding en informasie. Omgewingsbestuur wat byvoorbeeld toegang tot sensitiewe areas insluit. Veiligheid en sekuriteit.

Munisipale Bestuurder Mnr. Johan Jacobs noem: “Afgesien van die vereistes waaraan blouvlag strande moet voldoen, is die blouvlagprogram ook ʼn groot werkskeppings projek. Die doel van Blouvlagprogram is om die gemeenskap te dien en ons kusgebiede te bewaar.”

Blouvlagstatus word toegeken aan strande wat uitblink in die velde van veiligheid, netheid, voorsiening van geriewe en instandhouding van die omgewing standaarde. Die status dui daarop dat die strande skoon is, beskik oor voldoende ablusiegeriewe, parkering, omgewingsvriendelik en veilig is om te besoek asook voldoen aan internasionale veiligheid en toerisme standaarde.

Hessequa Munisipaliteit spog met vier volstatus en twee loodsfase blouvlag strande. Lappiesbaai en Preekstoel te Stilbaai, Witsand en Gouritsmond het volle blouvlagstatus verwerf en ontvang Jongensfontein en Stilbaai-Wes beide loodfase.
Hessequa se blouvlagseisoen sal strek vanaf 8 Desember 2016 tot 10 Januarie 2017.

Lappiesbaai is vereer met hul 12de agtereenvolgende jaar in die blouvlagprogram en Witsand spog met ʼn sewe jaar status.
Uitvoerende Burgemeester Raadslid Grant Riddles noem dat die blouvlagprogram ʼn groot invloed uitoefen op die Hessequa-streek se toerisme en plaaslike ekonomiese ontwikkeling. “Vele werksgeleenthede word geskep vir lewensredders, sekuriteitsbeamptes asook “Coast Care” werkers tydens die blouvlagseisoen. Die bevordering van werkskepping binne die plaaslike gemeenskap is van groot belang vir die Hessequa Raad.

KINDER STRAND

article-pic-1

Waar swem jy met jou kinders?

Wat maak een strand meer kindervriendelik as die volgende een… solank daar sand en branders is, wat maak dit saak? Nee, ouers wil ook ontspan op die strand en ’n tydskrif met een oog probeer lees. Daarvoor het jy ’n spesifieke soort strand nodig, verkieslik een met ’n lewensredder. As jou kinders klein is, is ’n strand met ’n strandmeer en/of rotspoele eerste prys. Jy kan saam met hulle seesterre of anemone soek in die rotspoele of vir hulle wys hoe om klipvisse te vang met seeslakkies as aas. Of julle kan saam ’n sandkasteel met ’n grag bou teen die rand van die strandmeer. En dan, sodra hulle goed besig is, sluip jy terug na jou handdoek toe…’n Verdere pluspunt, veral as jou kinders al sonder Polyotters kan swem, is ’n getypoel. Dis soos die see, maar heelwat veiliger. En die kersie op die koek is natuurlik ’n kombi wat draairoomyse verkoop in die parkeerterrein. Weg se keuse: Nature’s Valley, Palmiet (Kleinmond), Stilbaai, Morganbaai, Uvongo-strand, Umhlanga Rocks en Tietiesbaai (Kaap Columbine-natuurreservaat). En vir getypoele: Victoriabaai, Cintsa-Wes, Heroldsbaai en Salt Rock-strand.
Deur Esma Marnewick