VREDESTAFEL STILBAAI 2017

Na die baie suksesvolle aanbiedings van die Tafel van Vrede die afgelope twee jaar, is dit weer sulke tyd en is die moue opgerol deur die personeel van Ouma Lena se Huis,Badisa, die plaaslike polisie, plaaslike kerke en die gemeenskap van Stilbaai om ‘n nog groter Langtafel aan te bied. Verlede jaar het 1300 Stilbaaiers en besoekers hande gevat vir die seengebed voor die ete en die vermaak van daardie aand.

Hierdie jaar op Donderdagaand 30 November om 19h00 gaan Rooipitjiestraat weer lewe kry wanneer daar fees gevier gaan word in die atmosfeer van hande vat vir vrede met kos,vermaak uit die boonste rakke en bekende sprekers.

Die munisipaliteit is genader vir toestemming om strate toe te maak en vir praktiese hulp met stoele en tafels asook ander logistieke take, borge is nadergewink, die dienstesentrums en gemeenskap is opgeroep vir diens en die kaartjies verkoop flink.

Die vraag op almal se lippe is: “Hoeveel mense gaan hierdie jaar saam kuier?” Kom ons se sommer al klaar: “Baie, man, Baie!

Soos voorheen is daar weer bekendes wat saamwerk as motiveringsprekers en musiekmakers wat gaan sorg dat die aand ‘n luisterryke belewenis gaan wees.

Die hoofspreker wat ‘n besondere boodskap aan Stilbaai se gemeenskap gaan oordra, is Anthony Hall, stigter van RAEL – House of Davnik Safe and Sober Living. Hall wat self, die pad gestap het van gerekende speurder van die Dwelmtaakspan van die SAPS se Moord en Roofafdeling, tot suksesvolle sakeman tot die sit op ‘n bankie in die park as gevolg van erge alkoholgebruik.

Hy stig in September2007, saam met medestigterslid, Karin Hall, die bogenoemde organisasie en is die afgelope tien jaar betrokke in die stryd teen drank-en dwelmverslawing. Hall is ‘n gerespekteerde en gesogte motiveringspreker en het al op verskeie media-en radiostasies opgetree.

‘n Verrassing is die gaskunstenaar van die aand by die funksie en wat ook die Vrydagaand ‘n aanbieding van sy liedjies, musiek en sy “die pad geloop” sal lewer. Niemand anders as Hemelbesem (Simon Witbooi), bekende liedjieskrywer, sanger, aanbieder (Pasella) en vervaardiger van TV-programme en gemeenskapswerker nie.

Die Tafel vir Vrede vind Donderdagaand, 30 November om 19h00 in Rooipitjiestraat plaas. Die kaartjies kos R20 pp.

Hemelbesem se konsert vind Vrydagaand 1 Desember om 19h00 op die sportgronde in Melkhoutfontein plaas. Die koste per kaartjie is R20 pp.

Ouma Lena se Huis en haar span nooi u vriendelik uit na hierdie twee fuennksies ten bate van Ouma Lena se Huis se gemeenskapsontwikkelingsprogramme. Daar gaan fees gevier word, lekker geeet en musiek gemaak word. Dit alles oor grense van kleur, status en ouderdom. Waar daar ‘n samesnoer van die gemeenskap sal wees, ‘n stywe handdruk met die seengebede wat die funksies sal open. Irma Huysamer

Print Friendly, PDF & Email

Leave a Reply