Uncategorized

STILBAAI ROLBALKLUB

Stilbaai en omliggende rolbal klubs, Riversdal, Heidelberg, Witsand, Barrydale en Lydismith het oor 6 maande meegeding op die rolbal bane.

Daar was elke maand by ‘n ander klub gespeel. Elke klub span het uit 5 spelers bestaan, Twee het Dubbels gespeel en Drie het in die Trips gespeel teen ‘n ander klub.

Saterdag 25 November was dit die laaste wedstryd wat op Heidelberg in die hitte en sonder ‘n briesie van wind gespeel is.

Die spanne se punte was baie naby mekaar en na ‘n hewige stryd en baie sweet is Stilbaai Rolbalklub as die wenner van die reeks aangewys, Heidelberg was tweede en Lydismith derde.

Stilbaai het elke maand ‘n ander span ingeskryf vir die kompetiesie om soveel lede as moontlik bekend te stel met groot kompetiesies en elke span het baie goed presteer en baie geleer.

Die foto hierby is die span wat Saterdag gespeel het en die trofee in ontvangs geneem het.
Die span het bestaan uit vlnr. Piet Roodt, Tony Bailey, Barrydale se Voorsitter wat die prys oorhandig het,Marie Steyn, Gerald Enright en Eddie de Freitas.
Hiermee die wenners van die Personal Trust borgdag wat op Woensdag 29 November plaasgevind het
42 spelers het meegeding vir die pryse in baie lekker weer, Daarna het al die spelers lekker saam gekuier.

Die wenners was Lei : Veronica Enright, 2e : Reinette van den Berg, en die Skip : Piet Robbertse

In die 2e plek was Lei : Annette Gerber, 2e : Anita Linde, en die Skip : Danie Botes

En in die 3e plek was Lei : Gerald Enright, 2e : Liz Nowers, en die Skip : Mariana vd Walt

van die Redaksie

Dit is asof die lewe vandag een groot kompetisie is – almal wil wen, belangrik wees en bo uitkom.

Die probleem is, almal kan nie altyd wen nie !
‘n Wen en bo uitkom kom met sy eie stel probleme en uitdagings.

Vrees vir mislukking, aanvaarding en hebsug is dikwels die rede dat jy sonder om te dink voortstoom.
Die gevolg, kort voor lank laat dit jou sielsmoeg, uitgebrand en ontneem van die lag en vreugdes van die lewe.

As dit is waar jy in jou lewe is is dit lankal tyd om stil te raak en te herbesin !

Vergeet die kompetisie en gejaag na mensgemaakte geluk en rykdom.

Wees realisties oor jou verwagtinge en moenie jou werk en die lewe te ernstig opneem nie.

As jy eers in die kompetisie van die lewe vasgevang is kom jy nie maklik daaruit nie.
Jy moet grense stel en daarby hou.

Vergeet van status en belangrik wees.

Onthou gerus, vir almal wat bo is, is daar iemand onder. Besluit of ‘n wen belangriker is as dit wat jy moontlik gaan moet prysgee.

Op hoeveel mense moet jy nie dalk in die proses “trap” om ten alle koste, bo uit te kom nie ?

Hoe anders sou die lewe nie kon wees as ons deur liefde en omgee en nie deur wedywering, kompetisie en hebsug gedryf was om te wen en bo uit te kom nie ??

RUBRIEK UIT STILBAAI

Dis nou ‘n ding!

Deesdae, in stede, doen mens inkopies via die internet. Hommeltuie ‘drones’ kan kleiner aankope sommer by jou huis aflewer sê hulle. As jy dié advertensies glo, sal ‘Kentucky” eendag tot selfs in die platteland vir jou ‘n eetdingetjie kom aflaai! Hierdie idee is nie ver in die toekoms nie. Tegnologie ontwikkel vinniger as mense. Boere gebruik hommeltuie om hul landerye en vee van bo af te bekyk. ‘n Hommeltuig raas net as hy opstyg. Hierdie onbemande lugtuie word beheer deur elektronika vanaf die grond.

Van eetgoed gepraat … daar is ‘n vals persepsie, in Stilbaai, elke Desembervakansie, dat die twee groot kruidenierswinkels in ons dorp hulle pryse verhoog, en só inwoners en vakansiegangers uitbuit. Dit is eenvoudig nie waar nie. Die bestuur van die winkels het nie tyd om ongeveer drieduisend items op hul rake deur te gaan en pryse aspris te verhoog nie. As daar prysverhogings is, op veral varsprodukte, word dit deur die verskaffers deurgegee wat dit op hulle beurt aan die produsente moet betaal, wat noodwendig sy produkte teen ‘n hoёr prys moet verkoop as gevolg van skaarste, weens droogte of hoёr aanvraag. Dit is hoe dit is.

Robotte word reeds in die VSA baie gebruik in die vervaardigingsbedryf. Daar is selfs robot kroegmanne. Huisvrouens wil hoeka nou al vir hulle klein robotte bestel om huis skoon te maak. Wonder hoe die robotjies in die hoekies ook sal kan afstof met hul lompe vingers en stadige armpies.

Ons keer terug na die realiteit. Desjare, tot so lank as vyftien jaar gelede, as mens braai en gaste oornooi, pak jy die rooster volvleis – sommer driekeer. Die aroma van gebraaide vleis vul die lug en die monde water. Daar was nie braaibroodjies daardie tyd nie. Daar was pap en sous, aartappelslaai, nog slaaie én poeding! As die vleis gaar is word die groot aluminium bak uitgehaal,volgepak en almal sit aan, gesels en smul! Wat ‘n heerlike herinnering.

Deesdae, as jy mense oornooi, is daar die ongemaklikheid om vriende te vra om hulle eie ou vleisie saam te bring. Dis aardig om dan twee verdwaalde tjoppies of net ‘n worsie in ‘n bakkie te bring en vir die gasheer gee om gaar temaak. Daarna eet elkeen sy eie vleisie. Daar is ook nie pap en sous of ‘n groot bak aartappelslaai nie. Braaibroodjies is die in-ding. Meeste mans hou nie eers daarvan ombroodjies te braai nie.

Hoe arm het ons nie geword nie.

Mosselbaai se gas is op.
Lappiesbaai se toegangspaadjies na die strand is nou al vier oop. Dis maar ‘n gesukkel om teen die duine uit te stoom na bo. Alle sterkte vir julle ouens, wat jaar na jaar met nuwe idees vir ‘n gebruikersvriendelike strand, na vore moet kom.

Die gewoel by die brug nou onlangs was onvoorsien vir die padbouers. Hulle het met uitgrawings vir die pad, agtergekom dat die water en rioolpype se leeftyd verby is. Die oues was bros, gedaan, en nie diep genoeg in die grond nie. Nou sit hulle veselglas HDPE waterpype van 300mm in,voordat hulle met die padbouery kan aangaan. Nuwegroter HDPE 250mm rioolpype word ookingesiteer hulle kan voortgaan met die pad. Die pype is met 100mm elk vergroot. Hierdie nuwe groter pype word net ná die begraafplaas gekoppel aan die bestaande sisteem en dan sal alles weer vinniger vloei – die pad en die water.

Die goue karretjie wat hier in Stilbaai rondry is die begin van die einde vir veilig woon in ons dorp. Op sy deure staan ‘armed response’ – in Afrikaans, is dit ‘gewapende reaksie.’ Dit betekenhulle het gewere! Ons het mos ons eie Suidkus Sekuriteit.

Mag almal in hierdie feestyd so lekker en baie eet dat die sop spat en die broeke span.

On the Rocks maak eers DV volgende jaar weer oop.

Thea Scheepers