Op 9 November het die ACVV speelskool Hansie & Grietjie te Heidelberg ’n stampvol NG kerksaal vermaak met Disney Drome. Die konsert is ’n jaarlikse instelling en altyd baie kleur-en verbeeldingryk.
Vanjaar was Stefanie Keyser (tannie Fienie) weer aan die beurt. Sy het gesorg vir die teks, musiek en regie. Twee ou dames, Mona en Mavis, van Huis Zenobia wen ’n besoek aan Disneyland. Wanneer hulle in die lugballon ry, verloor Mavis haar valstande. Dit sit ’n geweldige soektog op tou en talle van die bekende Disneykarakters (en sommer ’n paar ander ook) word aangetref en gevra om te help. Tot Heidi en Peter het verskyn, laasgenoemde met ’n regte spierwit boklammetjie wat seker maar nog ’n week oud was en omtrent die toneel gesteel het. ’n Mens wonder of die verhoog nou al skoon is na al die ‘sneeu’ wat geval het tydens Frozen…
Sommige liedjies is gesing deur die groep en ander was opnames uit die bekende rolprente. Elke karaktertjie was tog te fraai en kontant en het die gehoor kort-kort aan die toejuig gehad. Die twee ‘juffrouens’ van die speelskool – Rolien Ackerman en Christelle Pick – was net soveel deel van die pret, eersgenoemde as Minnie Mouse en laasgenoemde as Sheherazade. Mona en Mavis is baie knap vertolk deur An-Mari Ackerman en Christa Croukamp.’n Hele span was regdeur agter die verhoog aan die woel met toneelwisselinge en so meer. Charles du Preez van Riversdal het Stefanie oudergewoonte uitstekend bygestaan met klank en beligting. Almal sien sommer nou al uit na volgende jaar se aanbieding.
Wim Vorster
wimvorster1@gmail.com
