Month: September 2017

Die mooiste kunswerke is besig om in te stroom vir die jaarlikse KANSA Art From The Heart- wat op Vrydag, 6 Oktober 2017 om 18:00 by die St Augustine Kerksaal, Meadestraat, George, aangebied word. Meer as 50 kunstenaars vanuit die Klein-Karoo en die Suid-Kaap neem vanjaar aan die projek deel.

Stilbaai het vanjaar weer van die mooiste skilderye ingestuur. Deelnemende Kunstenaars is onder meer Anita Barnard, Leone de Koning, Margie Smith, Chris Neser, Hugonda Breytenbach, Kassie van Noorwyk, Annie Albertyn en andere.

KANSA voorsien deelnemende kunstenaars van skilderdoeke en die hartskunswerk van die onderskeie kunstenaars word dan aan KANSA geskenk. Al die betrokke kunstenaars se werke word dan op Vrydag, 6 Otober 2017 uitgestal en opgeveil ten bate van KANSA Suid-Kaap Karoo wat die fondse weer op hul beurt aanwend vir dienslewering in die Streek.

“Ons is besonder dankbaar teenoor elke kunstenaar. Die werke wat ons tans al ontvang het is pragtig en werklik besonders. Die publiek is welkom om die veiling van die Suid-Kaap se beste kunstenaars by te woon teen R50 per persoon.

Vir meer inligting kontak Lucinda by 044 874 4824 of 082 66 33 529 of epos by lucinda@cansa.org.za.

Die jaarlikse KANSA Borskankerstap het vanjaar ‘n tema wat werklik skakerings vermaak vir die deelnemers skep. Die tema vir vanjaar se borskankerstap is “Shades of Pink”. Die borskankerstap vind ouder gewoonte weer by Langeberg Mall plaas, hierdie keer op Woensdag, 11 Oktober.

“Ons begin eers om 18:00 alhoewel ons reeds vanaf 17:00 beskikbaar sal wees vir inskrywings. Die tydsbepaling maak dit moontlik vir alle deelnemers om eers hul werksdag af te sluit en daarna rustig hul tekkies aan te trek en saam te stap.”

Vooraf-inskrywings kan reeds gedoen word. Skakel Lucinda by 082 66 33 529 of epos by lucinda@cansa.org.za. Begin jou kuite op ‘n krul trek en jou lyfie wikkel! Hier kom ‘n ding! Dis KANSA Borskankerstap op Woensdag, 11 Oktober om 18:00 by die Langeberg Mall!
Almal kan deelneem en dit is die ideale geleentheid vir besighede en organisasies om hul ondersteuning te wys en bietjie span te bou. Die sowat 5km roete is maklik en toeganklik vir alle deelnemers! Die sirkelroete word twee keer geloop (om die Mall. Diegene wat graag reeds per epos wil registreer, kan vir Lucinda Viljoen epos by lucinda@cansa.org.za. Die verrigtinge gaan om sowat 19:30 afgehandel wees. Kostes beloop R40 per volwassene en R15 vir kinders onder 15 jaar.

Enige organisasies of besighede wat graag van hierdie geleentheid gebruik wil maak vir bemarkingsdoeleindes, kan Lucinda skakel.
082 66 33 529

Lees: Prediker 3 : 1 – 15Lees: Prediker 3 : 1 – 15Fokusvers: Prediker 3: 1 en 2
Tyd is deel van God se skepping.  Voor die skepping was daar nie tyd nie.  Wanneer God die son, maan en sterre skep begin die sirkelgang, die herhaling van dag en nag, van seisoene, van peroides wat ingedeel is in jare,  dae, ure,  minute.  Reeds in die eerste hoofstukke van die Bybel lees ons van die ouderdom van mense, maar ook van die sirkelgang –  hy is gebore en hy het gesterwe.

Wat mooi en wonderlik moes wees, is deur die tragiese van die sondeval vernietig. Toe die mens gesondig het in die paradys, het hy nie in die ruimte ingeskiet nie, maar ‘n tydgebonde wese gebly. Tyd raak egter in plaas van ‘n seën vir die mens soos God bedoel het, nou die groot monster wat hom wil verslind.
Daarom is Prediker 3 ‘n klaaglied, omdat daar ‘n tyd vir alles is, ‘n tyd om te kom en ‘n tyd om te gaan.  Jy kan nie iets oorleef nie. Selfs die skepping is mooi op sy tyd en dan verweer dit. Daar is ‘n tyd om gebore te word en ‘n tyd om te sterwe. Besef ons dit – die twee grootste oomblikke van jou lewe het jy geen beheer oor nie. Jy kan nie bepaal wanneer jy gebore wil word nie en jy kan nie bepaal wanneer jy wil sterwe nie.  Jy is passief in die twee grootste oomblikke van jou lewe.

Daar is egter iets wat ons moet raaksien: Prediker roep na ‘n Verlosser  wat ons uit die greep van tyd kan verlos. Jesus Christus het dit gedoen. Wat het Hy gedoen?Sy Vader beskik alles, Hy kom in die volheid van die tyd, in volle beheer word Hy gebore op die uur waarin die hele wêreld  na ‘n Verlosser soek.   God bepaal die geboorteuur.  Christus word gebore binne tyd en ruimte, vir alles is daar ‘n tyd, so moet Maria dikwels hoor dat Sy uur nog nie gekom het nie.  Dan kom die werklike uur – die uur van kruisiging.  Hy sterf op die uur waarin Hy moet sterf, drie dae volgens Goddelike bepaling in die graf.  Toe Christus  die dood oorwin,  breek Hy die sirkelgang van geboorte en sterwe. Hy maak dit moontlik sodat God die onbepaalde tyd in die harte van mense deur sy Heilige Gees kan werk.
Onbepaalde tyd – die ewige lewe.  Dit bewerk Hy deur die wedergeboorte – iemand wat wedergebore is, het ‘n begin, maar geen einde nie, ons sterwe is dan slegs deurgang na die ewige lewe.  Daarna verlang ons, dit is ons toekomsverwagting.

Die Busy Lizzy Huis- en Tuinbouklub in Stilbaai het Dinsdag 19 September hul jaarlikse fondsinsamelingsfunksie vir Huis Stilbaai en Jagersbosch Gemeenskapsorgsentrum in die gemeenskapsaal Stilbaai gehou. Elsabe Alderich, die pretprater, was die gasspreker. Die projek is vir ons moontlik gemaak deur die wye ondersteuning van goeie borge. Die “Mad Hatter Tea Party” was ‘n groot sukses en die spreker het die gaste behoorlik laat lag.

Die Busy Lizzy Klub het ook van die geleentheid gebruik gemaak om hul resepteboek, STILBAAI SE KUIERKOS, bekend te stel. Al die resepte is getoetste resepte verkry van die klublede en hul vriende. Die projek is vir ons moontlik gemaak deur die ondersteuning van VAN LOVEREN, SOIL, MOSSTRICH, STILBAAI SPAR EN LADISMITH KAAS wat die volle drukkerskoste vir ons betaal het. Die boek beslaan 224 bladsye, mooi kleurfotos en verkoop vir R150.00 elk. Ons hoop om dit landwyd te versprei deur middel van die toeriste wat op Stilbaai kom vakansie hou. Deur die herdruk van eksemplare kan dit ‘n langtermyn projek word om fondse vir die twee instansies te genereer. Die boek is verkrygbaar by Helena le Roux, Christa Kunz, Leone de Koning en Maryna Huggett, maar enige klublid sal u kan verwys.

Alle fondse wat deur die projekte van Busy Lizzie Huis- en Tuinbouklub genereer word, word verdeel tussen Huis Stilbaai en Jagersbosch.